315. In festo ss. Philippi et Iacobi.

1 a. Concordemus in hac die
Voces nostras melodiae
Supernorum entium,

1 b. Principes qua populorum
Conscenderunt caeli chorum
Ex hac valle flentium.

2 a. Poenis quondam macerati,
Multa paucis collucrati,
Caducis caelestia,

2 b. Sunt concives angelorum
Nunquam passuri tortorum
Amplius supplicia.

3 a. Christum Philippus docturus
Phrygiamque conversurus
Crucis ligno figitur,

3 b. Tandem saxorum rotatu
Ex istius vitae statu
Moriens absolvitur.

4 a. Mira pollens sanctitate
Solymorum civitate
Iacobus emicuit,

4 b. Quem ob donum singulare
Sancta sanctorum intrare
Solum non dedecuit.

5 a. Iesum docens templi tholo
In praeceps deiecto solo
Genibus excipitur ;

5 b. Necis immemor iniustae
Orat Deum caesus fuste,
Cerebellum funditur.

6 a. Regna patent mox caelorum
Nec ab Alphide sanctorum
Turba deest obvia.

6 b. Iam coniuncti summo bono
Caeli resident in throno,
Magna nacti praemia.

7 a. Hac, vos, valle reis datos
Speciales advocatos
Speciali gratia

7 b. Merito spe singulari
Vobis ducibus donari
Petimus caelestia.