Scholium.

Bene explicat cum Philosopho, quomodo omne ens est idem vel diversum omni enti, quia idem continetur sub uno, et diversum sub multo. Vide eum in Text.

Dicendum, quod idem et diversum sunt contraria, quia idem est quoddam unum, et diversum quoddam multum. Sic dictum est supra quaest. 5. hujus, quod unum et multum sunt contraria, non extra entia; igitur idem et diversum sunt contraria, et non sunt extra entia. Sed intelligendum, quod quia substantia est radix omnium generum: et quia omnia, quae habent rationem entis ad substantiam attribuantur, sicut quod quid est principaliter in substantiis, per posterius in accidentibus, sic identitas et diversitas, sive idem et diversum principaliter insunt substantiis, et per attributionem aliis generibus. Et non solum extenduntur ad aliqua alia genera, sed etiam ad negationes et privationes, inquantum rationem entis participant, et ideo omne ens comparatum enti est idem vel diversum sibi.

Ad primum dicendum, quod licet identitas et diversitas per prius reperiantur in substantiis, per attributionem tamen sunt in aliis generibus. Sic autem non est de simili et dissimili, et aequali vel inaequali, quia non omnia habent attributionem ad quantitatem vel qualitatem.

Ad secundum dicendum, quod: ens comparatur non enti inquantum non ens, nec est idem, nec diversum. Ens tamen non enti comparatum, inquantum non ens, est quoddam ens, quia in non entibus sic consideratis invenitur idem et diversum, ut ratio in contrarium ostendit.

Diversum enim, et a quo est diversum, non necesse aliquo esse diversum, differens ab aliquo, aliquo sane differt. Text. 12.