317. De s. Quirino.

1 a. Laetetur hodie

Plebs clara Nussiae
Colens sollemnia

1 b. Quirini martyris,
Viri laudabilis
Vere per omnia.

2 a. Hic vir notabilis,
Romanus nobilis,
Tribunus militum,

2 b. Se Christi martyrem
Et vere militem
Ostendit inclitum.

3 a. Truncatis manibus,
Abscissis pedibus
Est in eculeo

3 b. Suspensus nequiter
Et hinc crudeliter
Occisus gladio.

4 a. Durum martyrium
Membrorum omnium
Fortis sustinuit.

4 b. Sic sine termino

Cum Christo Domino
Regnare meruit.

5 a. Et in hoc saeculo
Ut sol in speculo
Refulgens claruit

5 b. Multis miraculis
Et cunctis populis
Magnus apparuit.

6 a. Hic suam saepius

A saevis hostibus

Vexatam impie

6 b. Urbem eripuit,
Opem exhibuit
Suae potentiae.

7 a. Laetare, Nussia,
Quae Dei gratia
Prae multis emines

7 b. Et magnis meritis
Quirini martyris
Invicta permanes.

8 a. O quanta gloria
In caeli curia

Hic sanctus iubilat,

8 b. Qui tot miraculis
Cunctorum oculis
In terris rutilat !

9 a. Nam se rogantibus
Et invocantibus
Adest velociter,

9 b. Sibi contrariis
Et adversariis
Resistens fortiter.

10 a. O tutor optime,
Quirine maxime,
Patrone Nussiae,

10 b. Succurre filiis
Tuis auxiliis
Huius ecclesiae,

11a. Ut a daemonibus
Et malis omnibus
Salventur iugiter

11b. Et caeli gloria
Non transitoria
Fruantur pariter.