Sermo II .

Quaerite primum regnum Dei et iustitiam eius, Matthaei sexto .

Tria facit in verbis bis Dominus. Primo dat occasionem piae sollicitudinis: secundo proponit obiectum summae beatitudinis: tertio docet medium vitae rectitudinis. Primum est irascibilis debilitatae erectivum: secundum est concupiscibilis frigefactae accensivum ; tertium est rationalis obtenebratae illuminativum. Primum removet negligentiae tarditatem ; secundum excludit mundanae concupiscentiae vanitatem : tertium, malitiae gravitatem.

I. Quantum ergo ad primum dicit: Quaerite primum. Circa quod sciendum est, quod debemus quaerere sollicite: bonum amissum, baturae scilicet, quod amisimus per culpae malignitatem: et hoc, ne amittamus vitae iucunditatem: Amos quinto : Quaerite bonum et non malum, ut vivatis. - Bonum occultum, scilicet Scriplurae, quod est clausuro nobis per ignorantiae caecitatem; et hoc, ne incurramus stultitiae bestialitatem: Proverbiorum decimo quinto: Cor sapientis quaerit doctrinam, et os stultorum pascitur imperitia. - Bonum remotum, quod scilicet est gloriae et a nobis distat per concupiscentiae pronitatem: et hoc, ut consequamur quietis securitatem: Indicum decimo octavo: Et tribus Dan quaerebat possessionem sibi etc.

Debemus autem quaerere ista tria : totaliter sive integraliter sine divisione: Ieremiae vigesimo nono : Quaeretis me et invenietis: cum quaesieritis in toto corde vestro, inveniar a vobis etc. -Sinceriter sive simpliciter sine Actione: Sapientiae primo: In simplicitate cordis quaerite illum etc.

- Longanimiter sive perseveranter sine cessatione: Psalmus: Quaerite Dominum et confirmamini, quaerite faciem eius semper.

II. Quantum ad secundum: regnum Dei, quod quidem est quaerendum: sub ratione honesti, quia speciosum claritate: Sapientiae quinto : Accipient regnum decoris et diadema speciei de manu Domini.

Sub ratione conferentis, quia gloriosum felicitate: Psalmus: Gloriam regni tui dicent. - Sub ratione delectantis, quia deliciosum amoenitate: Lucae vigesimo secundo: Ut edatis et bibatis super mensam meam in regno meo.

Vel dicas, quod debemus quaerere regnum Dei, quod est triplex regnum, scilicet regnum naturae, in quo regnat Deus in medio bonitatis: Lucae decimo septimo : Regnum Dei intra vos est.

Regnum Scripturae, in quo regnat Deus in medio veritatis: Matthaei vigesimo primo: Auferetur a vobis regnum Dei et dabitur genti facienti fructus eius.

- Regnum gloriae, in quo regnat Deus in medio dignitatis: Psalmus: Regnum tuum, regnum omnium saeculorum etc.

III. Quantum ad tertium sequitur: et iustitiam eius, quae, secundum Glossam , est " omnia, quae Christus docuit, observare "; quae quidem est quaerenda : quia confert vitam spiritualem: Habacuc secundo : Iustus autem in fide sua vivet. - Quia acquirit amicitiam caelestem; Iacobi secundo: Credidit Abraham Deo, et reputatum est illi ad iustitiam, et ideo amicus Dei appellatus est.

Quia disponit ad aeternam suavitatem: Isaiae tertio: Dicite iusto, quoniam bene, quoniam fructum adinventionum suarum comedet.

Vel dicas, quia iustitia: regni naturae, quae est iustitia caritatis, qua homo non vult facere alteri quod non vult sibi fieri , tribuit regnum iucunditatis: Proverbiorum decimo : Iustitia liberabit a morte. - Regni Scripturae, quae est sobrietatis, disponit ad regnum claritatis: Proverbiorum decimo quinto: In abundanti iustitia virtus maxima est.

Regni gloriae, quae est felicitatis, tribuit vitam aeternitatis; Proverbiorum vigesimo primo: Qui sequitur iustitiam et misericordiam inveniet vitam, iustitiam et gloriam.