5 2 5

EX ACTIS CONSISTORIALIBUS

ALLOCUTIO SSmi D. N. Leonis XIII habita die 29 Novembris 1895.

Europa omnis, suspensis expectatione ac sollicitudine, ani- mis, ad propiorem Orientis plagam contuetur, intestinis offen- sionibus et luctuosis fessam casibus. Acerbum revera dolen- dumque spectaculum, infecta sanguine oppida, civitates: ferro flammisque ingentes pervastati tractus. - Dum viri principes, quae eorum summa laus est, collatis invicem consiliis, modum cladibus et securam incolumitatem innoxiis laborant exposcere, Nos quidem nequaquam omittimus, quantum est in Nobis, pro eadem caussa nobilissima iustissimaque contendere. Videlicet ante hos ipsos novissimos casus, niti pro gente Armenia animo libentissimo studuimus, implorataque excelsi Principis auctori- tate, concordiam, mansuetudinem, aequitatem suasimus. Quae quidem consilia Nostra haud sane visa displicere. Coepta per- sequi, propositum est : nihil enim tam cupimus, quam ut in maximi imperii finibus sua cuique incolumitas, suaque iura omnia salva, ut oportet, et sancta sint. Interea Armenorum afflictis fortunis tempestivum solatium a Nobis ne deesset, opem ferre egenis maturavimus, quos maxime calamitas per- culisset.

Nostra autem erga Ármenos studia, testimonium et fructus amplissimae Caritatis sunt, qua prosequitur gentes ex Oriente universas: quibuscum, ut probe nostis, adiumenta salutis sem- piternae, quaecumque in potestate sunt Ecclesiae catholicae, communicare quidem et volumus et conamur. Idcirco, qui No- biscum de fide discrepant, revocare ad concordiam, qui conve- niunt, devincire Nobiscum coniunctius, itemque iuvare omni ope atque ornare ingressi sumus.

Hac voluntate consilioque litteras Apostolicas nuperrime dedimus, ex quibus facile perspiciatur, quae mens Nobis erga Coptos, qui animus. Nimirum cum eorum pietatem et rei ca- tholicae per Aegyptum explorata incrementa haberemus, instau- randam Hierarchiam coptico ritu, dignitatemque pro Coptis pa- triarchalem Sedi Alexandrinae, quam Marcus evangelista nobi- litavit auctor idemque pontifex, restituendum curavimus.