325. De s. Sulpitio Bituricensi.

1 a. Civitas Puteolana,

Gratulare mente sana,
Laudes pangat plebs urbana
In laudem salvatoris.

1 b. In nostra sint memoria
Sanctorum natalitia,
Dum occurunt sollemnia,
Laudem promat vox oris.

2 a. Primus noster est patronus,
Ad orandum assit pronus,
Qui residet, ubi thronus
In suprema curia.

2 b. Hunc habemus protectorem,
Civitatis defensorem,
Nostrae patriae tutorem
Sub huius custodia.

3 a. Sublimatas ad honorem
Gravem pertulit laborem,
Templi dilexit decorem
Vir summae sanctitatis.

3 b. Templum istud consecrator,
In honorem dedicatur,
Sua prece conservatur
In die tempestatis.

4 a. Quem dignitas clericalis
Ornavit, sacerdotalis,
Potestas pontificalis,
A populo laudatur.

4 b. Hic construxit coenobia,
Diversa aedificia,
Praesertim haec ecclesia
Ad laudem dedicatur.

5 a. Rex plurimum infirmatur,
Dies festus prorogatur,
Et naufragus liberatur,
Constrictus resolvitur.

5 b. Inopia plebs premitur,

Quidam fur deprehenditur,
Flamma vorax restinguitur,
Rusticus submergitur.

6 a. Festinabant aegrotantes,
Gravi morbo laborantes,
Auxilium implorantes
Habent patrocinia.

6 b. Et contracti, claudi, muti
Et viribus destituti
Sanitati restituti
Per eius suffragia.