Sermo III .

Item, sermo fratris Bonaventurae in domo Praedicatornm de Bononia .

Propheta magnus surrexit in nobis, Lucae septimo .

In his verdis magisterium sive ministerium Domini nostri Iesu commendatur a tribus, et primo, a veritatis notitia: secundo, a potestatis eminentia: tertio, a sanctitatis excellentia.

I. Quantum ergo ad primum dicitur Propheta; circa quod nota, quod ipsius admiranda notitia ostenditur quantum ad quatuor, quae eum probant Prophetam. Fuit enim Propheta: intimissimus, quia cordium cognoscebat occulta ; Ecclesiastici vigesimo quarto : Penetrabo omnes inferiores partes terrae et inspiciam omnes dormientes et illuminabo omnes sperantes in Domino. Adhuc doctrinam quasi prophetiam effundam.

Expertissimus, quia ipse praevidebat et praedicebat futura: Ieremiae primo: Antequam exires de vulua, sanctificavi te et Prophetam in gentibus dedi te.

Elevatissimus, quia divinae Maiestatis lucide speculabatur arcana ; Numerorum duodecimo: Si quis fuit inter vos Propheta Domini, in visione apparebo ei, vel per somnium loquar ad illum.

Penetrantissimus, quia locorum intuebatur absentiam: quarti Regum quinto : Dixit Eliseus Propheta: Nonne cor meum in praesenti erat, quando reversus est homo de curru suo in occursum tui etc.

II. Quantum ad secundum dicitur magnus. Fuit autem Dominus lesus magnus: primo respectu creaturae non unibilis in daemonum expulsione: Ecclesiastici quadragesimo sexto : Fuit magnus secundum nomen suum, maximus in salutem electorum Dei, expugnare insurgentes hostes, ut consequeretur hereditatem Israel.

Secundo, respectu creaturae unibilis in mortuorum suscitatione; Ecclesiastici quadragesimo octavo: Amplificatus est Elias in mirabilibus suis. Et quis potest similiter sic gloriari tibi? Qui sustulisti mortuum ab inferis de sorte mortis in verbo Domini Dei.

Tertio, respectu creaturae sensibilis in animalium subiectione seu mansuetudine: Danielis quarto: Sensus meus redditus est mihi etc. - Quarto, respectu creaturae insensibilis in naturarum transmutatione: Sapientiae ultimo : In omnibus magnificasti populum tuum etc. Et loquitur de bac materia.

III. Quantum ad tertium sequitur: surrexit in nobis. Surrexit, inquam, ad nostram laetificationem:

per munditiam castitatis integerrimae; Ecclesiastici quadragesimo septimo : Surrexit Nathan Propheta in diebus David: et quasi adeps separatus a carne sic David a filiis Israel.

Per eminentiam paupertatis altissimae; Matthaei nono: Vocavit Matthaeum Iesus: et surgens, secutus est eum.

Per obedientiam humilitatis promptissimae; Lucae decimo quinto: Surgam et ibo ad patrem meum et dicam ei: Pater, fac me sicut unum de mercenariis tuis. -Per flammam caritatis latissimae; Ecclesiastici quadragesimo octavo : Surrexit Elias Propheta quasi ignis, et verbum ipsius quasi facula ardebat.