275. De sancto Leonhardo.
Ad Nocturnum.

1. Laxis resultant vocibus
Supernae matris filii,
Nam orbis in climatibus
Odor adspirat lilii.

2. Ecce, justus ut lilium
Florens per Dei filium,
Plantatus domo Domini,
Lumen adsistit lumini.

3. O Leonharde nobilis,
Columna es immobilis,
Coeli sita palatio,
Fruens omni solatio.

4. Natus Francorum genere
Puer nutritur tenere,
Chlodovaeus baptismate
Levat plenum charismate.

5. Adolescens spectabilis
Mundi pompas instabilis
Spernens Alvernam properat
Et Maximinum visitat.

6. Responso sumpto coelitus
Mox pergit Aquitaniam,
Reginae flenti anxius
Stillat salutis copiam.

7. De fonte gaudet fluido,
Nobis de fonte vivido
Ut Leonhardus hauriat,
Qui cor salire faciat.

8. Vivens Christo inhaeserat,
Ad quem post mortem properat,
Adornat Sion thalamum,
Dilectum carpens filium.

9. Sit trinitati gloria,
Ut Leonhardus docuit,
Nobis detur victoria,
Quae nullum hostem metuit.