Sermo II .

Amice, ascende superius, Lucae decimo quarto .

In hoc verbo, quod proponitur nobis in humilitatis praemium, tria nota, scilicet humilis animae ad Deum dulcis familiaritas, ibi: Amice: spiritualis profectus dignitas, ibi: ascende: sempiternalis gratius sublimitas, ibi: superius.

I. Circa primum nota, quod efficitur quis amicus Dei: per sinceritatem sanctimoniae; Proverbiorum vigesimo secundo : Qui diligit cordis munditiam propter gratiam labiorum suorum, id est intellectus et affectus purgatorum, habebit amicum regem. - Per humilitatem obedientiae; Ioannis decimo quinto: Vos amici mei estis, si feceritis quae ego praecipio vobis. - Per austeritatem poenitentiae: Psalmus: Mihi alienigenae amici facti sum etc.

- Per longanimitatem patientiae; Iudith octavo : Abraham, per multas tribulationes probatus, Dei amicus effectus est.

II. Circa secundum nola, quod debemus ascendere: ad conscientiam renovandam frequenter per sedulitatem confessionis; primi Machabaeorum quarto : Ecce, contriti sunt inimici nostri; ascendamus nunc mundare sancta et renovare. - Ad sapientiam investigandam ferventer per pietatem meditationis: Isaiae secundo: Venite et ascendamus ad montem Domini et ad domum Dei Iacob, et docebit nos vias suas, et ambulabimus in semitis eius.

Ad iustitiam prosequendam diligenter per sanctitatem conversationis: Psalmus: Quis ascendet in montem Domini? Aut quis stabit in loco sancto eius? Innocens manibus et mundo corde.

Ad victoriam obtinendam potenter per virtutem dimicationis: Canticorum septimo : Ascendam in palmam et apprehendam fructus eius.

III. Circa tertium nota, quod illud superius aeternuin, ad quod ascendit amicus Dei, est: gloriosum in veneratione divinae Maiestatis: Psalmus : Quoniam Deus magnus Dominus et Rex magnus super omnes deos.

Speciosum in admiratione summae veritatis: Isaiae sexagesimo: Super te orietur Dominus, et gloria eius in te videbitur.

Deliciosum in refectione aeternae bonitatis: Ecclesiastici vigesimo quarto: Spiritus meus super mel dulcis, et hereditas mea super mel et favum.

Copiosum in adimpletione humanae voluntatis: tertii Regum undecimo : Regnabis super omnia, quae desiderat anima tua; Iudicum primo Dedit ei irriguum superius et irriguum inferius.