329. De s. Thoma Cantuariensi.

1 a. Mundi pompam vicit almus
Christi martyr, unde psalmus
Canitur in iubilo.

1 b. Voce, voto concordemus
Et in actu personemus
Laudes Dei filio,

2 a. Ib quo fixus testis legis
Factus forma sui gregis
Patitur supplicium.

2 b. Quod volebat, diffinivit

Praesul Thomas, quem attrivit
Cinis et cilicium.

3 a. Terris pauper, caelo dives
Caeli regnat inter cives
Caelesti convivio;

3 b. Iustis forma disciplinae,
Lapsis spes est medicinae,
Angelus in bivio.

4 a. Cain Abel interfecit,

Frater fratrem, plus adiecit
Hostilis nequitia,

4 b. Nam in patrem surgit natus
Nec veretur matris latus,
O quanta saevitia!

5 a. Israelis sub exemplo

Lapis quadrus est in templo,
Cum mactatur aries.

5 b. Legis tenens armaturam
David dictus per figuram,
Duplex templi paries.

6 a. Passus signat Zachariam,
Raptus Enoch vel Eliam
Veritatis azyma.

6 b. Hostis perit in fornace,

Martyr Thomas stat in pace
Pia factus hostia.

7 a. Aquis sanat Elisaeus,

Nos per ipsum sanat Deus
Sale sapientiae ;

7 b. Ille lepra sanat Syrum,
Iste multos, dictu mirum,
Salvat dono gratiae.

8 a. Iob dolentis signativus

Iam per mortem regnat vivus
Moysi consocius:

8 b. Minas spernens Pharaonis
Mare transit passionis
Percurrens quantocius.

9 a. Ergo, martyr, huc attende,
Placa Deum, nos defende
De mortis angustia,

9 b. Ut te duce viam vitae
Ambulantes expedite
Cantemus Alleluia.