Sermo III .

Amice, ascende superius, et erit tibi gloria coram simul discumbentibus, Lucae decimo quarto .

Tria notantur hic, scilicet Dei aeterni ad humanum genus clementia dulcissima, ibi: Amice: exhortatio saluberrima, ibi: ascende superius: exhortationis utilitas sempiterna, ibi: et erit tibi gloria etc.

Vel alio modo circa virum iustum et Deo devotum tria notantur, scilicet amor gratiosus, profectus virtuosus et status gloriosus.

I. Circa primum noto, quod efficitur quis amicus Dei maxime per tria, scilicet per contemptum mundanorum: Iacobi quarto : Amicitia huius mundi inimica est Dei. Quicumque ergo voluerit amicus esse saeculi huius inimicus Dei constituitur.

Per desiderium aeternorum: Proverbiorum vigesimo septimo: Unguento et variis odoribus delectatur cor, et bonis amici consiliis anima dulcoratur.

Per sustinentiam adversorum; Lucae duodecimo: Dico autem vobis amicis meis: Ne terreamini ab his qui occidunt corpus et post haec non habent amplius, quid faciant.

II. Circa secundum nota, quod debemus ascendere superius: per sedulitatem devotae orationis: primi Regum primo : Ascendebat vir ille de civitate sua statutis diebus, ut adoraret et sacrificaret Domino exercituum in Silo.

Per puritatem rectoe intentionis; Psalmus: Quis ascendet in montem Domini? Aut quis stabit in loco sancto eius? Innocens manibus et mundo corde etc.

Per sublimitatem serenae contemplationis: Exodi vigesimo quarto: Ascenderuntque Moyses et Aaron in montem ad Dominum etc. Videruntque Deum Israel etc

III. Circa tertium nota, quod sic ascendentibus erit gloria: inaestimabilis honoris in conspecta Maiestatis aeternae; Psalmus : Gloria et honore coronasti elim et constituisti eum super opera manuum tuarum.

Admirabilis decoris in. conspectu claritatis supremae; Psalmus: Gloriam et magnum decorem impones super eum.

Interminabilis iucunditatis in conspectu bonitatis summae; Ecclesiastici vigesimo tertio: Gloria magna est sequi Dominum, longitudo enim dierum assumetur ab eo.