330. De sancto Torpete.

1 a. Persolvamus mente laeta
Laudes, quas Torpes athleta
Meruit constantia.

1b. Ille pro nomine Christi
Animo laeto, non tristi,
Pertulit supplicia,

2 a. Dum regnaret furibundus
Nero, cuius aegre mundus
Ferebat imperium.

2 b. Nero restaurat Pisanam,
Venerabatur Dianam,
Colitur per impium.

3 a. Praesumpserat esse Deum,
Caelum paravit aeneum,
Columnis sustentatur;

3 b. Tonitrua sunt commota,
Aer, terra simul mota,
Populus conturbatur.

4 a. Aquae guttae destillautes
Per canales profluentes,
Pluviam simulabant;

4 b. Per foramen fistularum
Solis et cursus stellarum
Et lunae demonstrabant.

5 a. Hic magnus in palatio
Despecto sacrificio
Occulte baptizatur.

5b. Tradidit hunc puniendum
Et acriter feriendum;
Ab angelo solatur.

6 a. In carcere per triduum
Permanserat continuum,
In columna stringitur ;

6 b. Orante columna ruit,
Multos paganos obruit,
Et turba convertitur.

7 a. Leopardus prosternitur,
Et saevus leo moritur,
Unde plebs admiratur.

7 b. Iuxta mare deducitur,
Ibi locus statuitur,
Et capite truncatur.

8 a. Cum cane gallus ponitur,
Et in mare proicitur
In conspectu omnium,

8 b. Ut a brutis roderetur
Vel in aquis mergeretur,
Ut sit cibus piscium.

9 a. Regni partem obtinebat
Celerina, hanc regebat
Omni cum iustitia ;

9 b. Ut ab aquis liberetur,
Per somnium admonetur
Inter noctis silentia.

10 a. Agatis festum Torpetis,
Post tormenta capietis
Sempiterna gaudia;

10 b. Festum depositionis
Et festivitas agonis
Colatur cum gloria.