Sermo III .

Item, sermo fratris Bonaventurae in Conventu Parisius.

Magister, quod est mandatum magnum in Lege? Ait illi testis: Diliges Dominum Deum tuum, Matthaei vigesimo secundo .

Quamvis ille Legis doctor tentative proposuerit verba prima, propter responsionem tamen Domini subsecutam ad nostram salutem dedit nobis materiam proponendi ea pie et vere. Unde dicere possumus catholice, quod in verbis his duo tanguntur, scilicet nobilis quaestio nostrae salutis, et salutaris determinatio per os Veritatis.

Circa totum nota, quod cum beatus Dionysius dicat libro septimo paragrapho tertia Caelestis Hierarchiae, quod instructor principalis omnium spirituum est ipse Dominus Iesus; et beatus Augustinus dicat in libro, qui inscribitur de Magistro, quod solus Christus est doctor; ideo merito proprie et vere per excellentiam vocatur magister principalissimus Angelorum in omni hierarchia: Beatorum, in omni gloria; iustarum, in omni Ecclesia. Ipse enim gloriam suam communicando Angelis et Beatis in caelo empyreo ad plenum et fontaliter, post beatam Mariam, quae omnium hierarchiarum gaudet fluentiis et gratiis, docet in caelo et docet in terra.

In caelo docet Seraphim et Apostolos sursum extendi desiderabiliter per dilectionem fontalis amoris: Cherubim et Doctores alios elevari venerabiliter per contemplationem fontalis splendoris: Thronos et Confessores praecipuos sursum deliciari suaviter per fruitionem fontalis saporis: Dominationes et Martyres inclytos sursum gloriari reverenter per spirituum nobilitatem in aspectu fontalis creationis: Principatus et pontifices reverendos sursum radicari honorabiliter per desideriorum fixionem in aspectu fontalis gubernationis: Potestates et reges gloriosos sursum tripudiare triumphaliter per laudum reportationem de victoriis in conspectu fontalis conservationis: Virtutes et Virgines gratiosas sursum solidari et conservari mirabiliter per votorum adeptionem in conspectu fontalis remunerationis: Archangelos et praedicatores evangelicos sursum glorificari coruscanter per revelationem quam habent continuam irradiationis: Angelos et ministros Dei electos sursum exhilarari confidenter per visionem, quam percipiunt in conspectu fontalis communicationis: homines et mulieres et pueros, qui non ascenderunt ad angelicos gradus, sursum delectari sufficienter per assecutionem, quam habent de meritis crucifixi Salvatoris in aspectu illius summi et universalis Redemptoris. Pro quibus omnibus et de quibus omnibus dicitur Matthaei vigesima tertio : Unus est Magister in caelis, qui est Christus.

E contrario diabolus docet in inferno contraria et deprimit ad contraria.

In terra vero docuit et docet: universalem simplicitatem ; Matthaei decimo : Estote simplices sicut columbae.

Universalem puritatem; Matthaei quinto: Beati, mundo corde, quoniam ipsi Deum videbunt.

Universalem paupertatem; Matthaei quinto: Beati, pauperes spiritu, quoniam ipsorum est regnum caelorum.

Universalem sanctitatem: Lucae duodecimo : Lucernae ardentes in manibus vestris.

Universalem pietatem; Lucae sexto: Estote misericordes, sicut et Pater vester misericors est. - Universalem veritatem; Ioannis octavo.: Cognoscetis ve?italem, et veritas liberabit vos.

Universalem humilitatem: Matthaei undecimo : Discite a me, quia mitis sum et humilis corde.

Universalem sobrietatem: Ioannis sexto: Operamini non cibum, qui perit, sed qui permanet in vitam aeternam. - Universalem pacem: Marci nono: Habete in vobis sat, et pacem habete inter vos.

Universalem serenitatem ; Lucae decimo octavo : Dicebat autem lesus: Quoniam oportet semper orare et non deficere.

Universalem caritatem; Matthaei Lucae vigesimo primo : In patientia vestra possidebitis animas vestras.