336. In Festo Reliquiarum.

1 a. Pretiosi sancti Dei,
Quorum colit lux diei
Praesentis sollemnia,

1 b. Date nobis in vestrarum
Celebri reliquiarum
Gaudere memoria.

2 a. Ierusalem vos caelestis
In structura bases estis,
Stilus, epistilia;

2 b. Bases fide confirmati,
Stilus per spem elevati,
Pars est amor tertia.

3 a. Praefulgentes margaritae,
Tot pressuris expolitae
Digna fertis praemia.

3 b. Vos inscripti libro vitae,
Verae viti nos unite,
Per quam vivunt omnia.

4 a. Flores verni, vos electi,
Lapides in summa secti
Sion aedificia,

4 b. Dulcis odor unguentorum,
Dulcis sapor pigmentorum,
Caelica cellaria.

5 a. Nos Aegypto constituti
Mereamur esse tuti
Vestra per suffragia;

5 b. Hoc in solo nos salvetis
Et cum Christo nobis detis
Angelorum gaudia.