QUAESTIO XIX. Utrum duae differentiae differant inter se ?

S. Thom. citat. quaest, anteced. Albert. Magnus tract. 2. c. 10. Flandria quaest. 11. art. 1. Fouseca citat. in quaest, anteced. Suarez disp. 15. sect. 10.

Videtur quod non, differentia sunt diversa circa idem aliquid entia : sed omnia talia sunt composita ex aliquo quod est idem, et aliquo quod est diversum: cum ergo differentiae sint simplices non sunt differentes.

Item, omne differens est aliquo differens: si ergo differentia differat, quaero de illo in quo differat, aut illud est differens, aut non? Si non est differens, tunc est diversum, et pari ratione standum esset in primo. Si differens; igitur aliquo est differens, et sic in infinitum. vel standum est in aliquo, et pari ratione in primo.

In omni composito est aliquid, quod non est elementum, nec ex elementis, per Aristotelem in 7. hujus, text. 70. quod quid est formae sive quidditas rei: si ergo differentia differt , per consequens composita esset, et aliquid esset in differentia praeter partes ipsius, et per consequens differentia non esset ultima perfectio definitionis sed aliquid formale. in differentia.

Idem dicit Philosophus in littera, dicit enim quod differentia secundum speciem est contrarietas, nec tamen videtur differre.

Ad oppositum : differentia sunt diversa circa aliquid idem entia, sed duae differentiae possunt esse hujusmodi. Probatio assumpti : differentia inferiorum claudit in se intellectum superiorum, aliter pluralitas differentiarum in definitione non faceret nugationem, quod est contra Aristotelem in 7. text. 42. et differentia inferiorum aliquid addit ad superiorem, alioquin non faceret diversum aliquid in specie a differentia sibi opposita.

Item, unumquodque propter quod illud magis, sed species sunt differentes propter differentias ; ergo differentiae sunt magis differentes.

Item, si abstractum de abstracto, et concretum de concreto, sed omnis contrarietas est differentia: igitur omne contrarium est differens : sed differentiae sunt contrariae ; ergo differentiae sunt differentes.