339. De sanctis Evangelistis.

1 a. Adoretur ille Deus,

Quem Iohannes, quem Mat-
thaeus,
Lucas, Marcus praedicant;

1b. Quorum formas aquilina,
Homo, bos et leonina
Per figuras indicant.

2 a. Actus, dicta, signa Christi,
Vitam, mortem scribunt isti

Speciali gratia:
Aquila de numine
Et homo de homine

Tractant evangelia;

2 b. Taurus notat passionem,
Leo resurrectionem ;

Haec sunt specialia.
Idem fons, sed rivuli
Diversi, dum singuli

Quaedam dicunt propria.

3 a. Arcet, fugat daemones
Per diversos canones
Eadem materia;

3 b. Sanat, docet, reficit
Doctrina, quos afficit
Quaeque pestis varia.

4 a. Dum caelorum sonat caelis,
Quattuor Ezechielis
Cantant animalia ;

4 b. Dulcis sonus, dulcis nota,
Notat rotae mixta rota
Fidei mysteria.

5 a. Supra legis documentum
Eliquatur hinc frumentum,
Unde fluit simila,

5 b. Quae nos pane pascit eo,
Quo pascuntur isti: leo,
Homo, bos et aquila.

6a. Astant isti circa thronum
Haurientes verbum bonum
Verbi sapientia.

6 b. Quorum verbum nos conducat

In salutem et perducat

Ad aeterna gaudia.