Sermo IV .

Sermo fratris Bonaventurae populo Assisii.

Renovamini spiritu mentis vestrae et induite novum hominem, qui secundum Deum creatus est, ad Ephesios quarto .

Duo hic facit Apostolus: primo hortatur ad vitiorum universalem depositionem, ibi: Renovamini spiritu mentis vestrae; secundo, ad morum et actuum Christi assumtionem, ibi: et induite novum hominem etc.

I. Circa primum nota, quod renovatur quilibet spiritualiter: per omnium peccatorum detestationem plenariam: ad Colossenses tertio : Exspoliantes vos veterem hominem cum actibus suis et induentes novum, eum qui renovatur in agnitionem secundum imaginem eius qui creavit illum.

Per interiorum Deo consecrationem perfectam; primi Machabaeorum quarto: Ascendamus nunc mundare sancta et renovare.

Per morum ostensionem mundo praeclaram: primi Machabaeorum duodecimo: Jonathas misit nos, ut renovaremus amicitiam et societatem secundum pristinum.

II. Circa secundum nota, quod induit quis novum hominem, Christum: per amoris totalis transformationem in ipsum: ad Romanos decimo tertio : Induimini Dominum Iesum Christum, et carnis curam ne feceritis in desideriis.

Per veritatis iustitialis aemulationem propter ipsum; Isaiae quinquagesimo nono: Iustitia indutus est ut lorica et galea salutis in capite eius.

Per sanctitatis regularis operationem iuxta ipsum: ad Romanos decimo tertio: Induamur arma lucis. Sicut in die honeste ambulemus.