290. De sancta Marcellina.

1. Nunc Marcellinae virginis
Ovantes, omnes populi,
Hymnum Christo concinite
Agentes diem celebrem.

2. In quo plane sanctissima,
Felix et beatissima
Devicto mundi principe
Migravit ad coelestia.

3. Quae rite membra subigens
Jejuniis et precibus,
Instanter mente egerat,
Ut fide coelum scanderet.

4. Haec quondam saeclo nobilis,
Sed nunc coelo sublimior,
Tunc proxima senatui,
Nunc angelorum socia.

5. Cujus mores instituit
Germanus et episcopus,
Toto orbe notissimus,
Orthodoxus Ambrosius.

6. Haud minus hanc perdocuit
Servire Christo Domino
Illustris frater Satyrus,
Vir Christo devotissimus.

7. Ultra citraque latera
Sic fulta penis exstitit
Sublimis, imperterrita,
Muro vallata duplici.

8. Hanc ergo senes, hanc anus,
Hanc deprecemur juvenes,
Ut nobis apud Dominum
Auxilietur jugiter.

9. Gloria sit Deo patri
Et laus unigenito,
Sancto simul paraclito
In sempiterna saecula.