354. De sanctis Confessoribus.

1 a. Verbum patris humanatum,
Ex mortuis suscitatum,
Super caelos elevatum
Collaudet ecclesia;

1 b. Cui chorus apostolorum,
Martyrum et confessorum,
Virginum et electorum
Assistit in gloria.

2 a. Qui mundi regna vicerunt,
Qui stolas suas laverunt
Et eas dealbaverunt
Agni sacro sanguine,

2 b. Qui terrena calcaverunt
Et victores exstiterunt
Et in Christi meruerunt
Coronari nomine.

3 a. Inter eos coronatur,
Cuius festum celebratur
Et cum Christo gloriatur
In caelesti curia.

3 b. Supplicamus eius prece
Sublevari nos a faece
Et a peccatorum nece
Ad caeli palatia.