355. De s. Virgine Martyre.

1 a. Regnum mundi, non supernum,
Ut regnarent in aeternum,
Reliquerunt virgines;

1b. Ut quiescant post labores,
Spernunt plagas et tortores
Et effundunt sanguines.

2 a. Ad tormenta sunt veloces
Nec abhorrent tam feroces
Poenas et supplicia;

2 b. Mori volunt sic pro Deo,
Ut revivant coram eo,
Per quem vivunt omnia.

3 a. Trucidantur a tyrannis,

Cum sub paucis essent annis,
Flecti tamen nequeunt ;

8 b. Fortes erant ante reges
Praedicando Christi leges
Sponte poenas subeunt.

4 a. Quaedam currunt ad certamen
Deferentes ad examen
Rosam atque lilium;

4 b. Quaedam vero sine rosa,
Alba tantum, sed formosa,
Venit ad convivium.

5 a. Albae quaedam non rubescunt,
Neque tamen erubescunt
Coram Dei filio;

5 b. Omnes pulchrae vel decorae,
Sed maiori flos cum rore
Gaudet privilegio.

6 a. Omnes quidem sunt prudentes
Et quae rubent et albentes,
Nulla caret oleo;

6 b. Quaeque felix et beata
Veste venit deaurata
Cum ardenti cereo.

7. Ergo Christum exoremus,
Ut cum illis conregnemus
Et gaudentes exsultemus
Sursum in empyreo.