356. De sanctis Viduis.

1 a. Electarum merita
Recolit ecclesia
Suos salutaria
Docens vitae monita;

1 b. Requirit per gratiam
Nos ad fidelitatem
Christi dans in gratia
Familiaritatem.

2 a. Reliquit haec femina
Carnis desideria,
Cepit vestem lugubrem,
Super caput cinerem.

2 b. Substravit cilicium,
Tulit omne vitium,
Cui stillicidium
Venit per crucifixum.

3 a. Ergo paenitentia,
Altissimi filia,
Virgo semper modesta,
Ridens, solaciosa,

3 b. Cum benedictionis
Hanc pane saturavit
Et incorruptionis
Potu refocillavit.

4 a. De sanctorum germine
Linum delectabile
Et de agni vellere
Lanam sibi quaerere

4 b. Coepit et contexere
Caritatis opere
Vestem innocentiae,
Tinctam agni sanguine.

5 a. Indumentum sunt ei
Decor et fortitudo,
Et cum sanctis ridebit
In die novissimo.

5 b. Quam et in caelestibus
Portis opera eius
Laudant, nam universas
Ipsa est supergressa.

6. Cuius intercessio
Nos ab hoc exsilio
Reddat Dei filio.