373. De sancto Machuto.

1. Benedicite Dominum,
Gubernatorem omnium,
Qui novum dedit famulum,
Machutum, ducem Britonum.

2. Sanctus Machu egregius
In die Paschae est natus
Cum eo triginta tribus
Simulque natis penitus.

3. Fueruntque eruditi
Delhtici quoque domini,
In una die periti,
In elementis edocti.

4. Sanctus Maehlous inprimo
Habuit virtutem de Christo,
Frigorem nunquam habuit,
Pallium a se eiecit.

5. Hic quadam die perrexit,
Ad litus maris pervenit
Et illic ludens dormuit,
Cum quo insula ascendit.

6. Hic belvam immanissimam
Palpavit ut agniculam,
In die Paschae super quam
Sollenni cantavit missam.

7. Ibi quaerebat insulam,

Quam semper vocamus Inman,
Non reperiesque illam
Revertens venit patriam.

8. Didascalum hic audivit,
Evangelio qui dixit:
Vitam aeternam habebit,
Patriam qui reliquerit.

9. Sanctus Machu hoc audiens,
Patriam suam relinquens,
Ad Colinum perveniens,
Paratam navem intuens.

10. Quae habebat instrumenta,
Velum extensum in ea,
Hominibus at vacua,
Christus sedebat in ea.

11. Ancoramque qui tenebat,
Illos quoque invitabat
Navigare per maria
Transmarinorum patria.

12. In illam cito intravit
Et ventus validus venit,
Velum quoque adimplevit,
Et navis mare sulcavit.

13. O ecclesiae lux magna
Et sacerdotum gloria,
Dum gregi praestas pabula,
Cordi pandis mysteria.

14. Hic venit ad civitatem
Aletis intrans gaudentem,
In qua multis virtutibus
Ostendit se hominibus.

15. Curavit quoque leprosos,
Curvos erexit sanatos,
Resuscitavit mortuos,
Qui inde vixerunt sanos.

16. Rex caelorum altissimus,
Solus excelsus Dominus,
Non clauditur temporibus
Permanens semper aeternus.

17. Qui et vocavit optimum
Machutum suum famulum,
Sanctum atque mirificum,
Doctorem quoque perfectum.

18. Verus hic evangelicus
Athleta Dei optimus
Contempta mundi gloria
Centena sumpsit praemia.

19. Audite omnes fulgida
Sancti Machutis opera
Episcopi praecipua,
Magna et principalia.

20. Coram Deo dignissima,
Hominibus placentia,
Diffamata per tempora
Huius mundi novissima.

21. Quem copulasti, Domine,
Angelorum in ordine,
Benedictus a Domino,
Deo deorum superno.

22. Chaleuxomen Dominum
Omnipotentem, supernum,
Ut mereamur fulgidum
Intrare habitaculum.

23. Ibi permanet gaudium
In lumine viventium,
Sanctus, sanctus dicentium,
Sanctus Deus virtutium.

24. Hymnum Machutis beati,
Viri in cunctis optimi,
Decantate, presbyteri
Eius et plures magistri.

25. Magni quoque et pusilli
In memoria animi
Uti virtute meriti
Patris vestris salvemini.

26. Rogamus Christum Dominum,
Regem, rectorem omnium.
Nobis ut praestet solidum
In hoc mundo auxilium,

27. Nostri patris per meritum
Machutis validissimum,
Ut mereamur gaudium
Possidere angelicum.

28. Haec est feria sollennis,
In qua sacerdos nobilis,
Sanctus Machlou egregius
Caelos conscendit arduos.

29. Et nos armore debite
Debemus laudes dicere
Machuti nostro auctori,
In sceptro poli manenti.

30. Cuius beatis precibus
Mundemur a sceleribus,
Ut consequamur praemia
Eius colentes merita.

31. Praeferimus te laudibus
Et postulamus precibus,
Ut piis nos suffragiis
Liberes a piaculis.

32. Gloria praeclarissimo
Christoque regi optimo
Et patri perfectissimo,
Spiritui quoque sancto.

33. Gloria perenni Deo
Unctoque Jesu Domino,
Almo quoque paraclito
In saecula saeculorum.