Scholium.

In Deo nulla est magnitudo, quia finita esse nequit in Deo, et infinitam dari repugnat. Secundo quia esset in potentia. Tertio quia nullum corpus est perfectissimum. Vide Sectum in hunc textum, et 8. Physic, text. 87.

Dicendum, quod primum principium non habet magnitudinem, quia nulla magnitudo movet non mota; sed primum principium movet non motum ut dictum est prius, supra q. 9.

Item, in omni magnitudine est aliqua potentia, quia divisibile est in infinitum, et ibi sunt partes in potentia ; sed in primo principio non est potentia, sed actus primus: igitur, etc.

Item, primum principium est perfectissimum: sed nulla magnitudo est perfectissima, quia omnis magnitudo est corpus, et aut vitam habet, aut non. Corpus non vivum est imperfectius vivo: corpus autem vivum non habet vitam inquantum corpus, quia sic omne corpus viveret, imo si vivat, hoc est per animam, et inquantum vivum perfectius est non vivo; anima ergo perfectior est corpore: ergo corpus non potest esse perfectissimum: sed primum principium est perfectissimum: ergo non habet corpus, nec per consequens magnitudinem aliquam.

Ad primum argumentum dicendum, quod situs proprie debetur corpori. Quod autem Philosophus dicit, quod movens primum est in circumferentia, hoc non est secundum determinationem suae substantiae, sed secundum amplitudinem suae virtutis: si enim primum esset sicut in circumferentia, non semper esset in Oriente. Nunc autem dicimus, quod movens caelum est in Oriente, quia ibi motus ejus incipit, et ita dicitur primum esse ibi secundum ampliationem influentiae, et non secundum determinationem substantiae.

Ad secundum dicendum, quod Philosophus non intendit quod primum principium sit animal: sed hoc dicitur a quibusdam secundum metaphoram, quia nihil vivit apud nos vita intellectiva nisi animal, et ideo dicunt quidam antiqui dicendum esse animal. Sed manifestum est, quod in animali aliud est quam vita, proprie loquendo, quod in ipso est principium vitae, quo modo est anima. Nunc autem dicit Philosophus text. 38. hujus quod Deus est ipsa vita optima et sempiterna, quod ipse non dicit de aliquo animali. Ad tertium dicendum, quod finitum et infinitum ex parte materiae quantitati congruunt, non tamen ex parte formae ; sed primum principium est infinitum ex parte formae, non enim oportet quod habeat quantitatem.

Oportet ergo principium esse tale cujus substantia actus: amplius igitur tales oportet substantias esse sine materia. Text. 30.