374. De sancto Nicolao.
Ad Vesperas.

1. Omnium clemens petimus creator,
Ut pius nostros miserans labores
Supplices cantus humilis catervae
Votaque sumas.

2. Hanc diem grato celebrare festo
Da, pater, carus tibi Nicolaus
Pontifex in qua requiem supernam
Laetus adivit
3. Interest caris ubi nunc choreis
Atque sanctorum comes angelorum,
In tuae vitam deitatis almam
Laude perennat.

4. Unde nos crebro miseros revisat,
Quos adhuc terrae gravat incolatus,
Liberos carnis petat hos vocari,
Quo manet ipse.
5. Qua potens fuit vita in caduca,
Nunc datam multo sibi ditiorem
Gratiam monstret super impetrandis,
Quaeque rogabit.

6. Gloriae summum decus atque laudis,
Trinitas verax Deus unitasque,
Sit tibi semper, sit ubique cuncto
Fine remoto.