3 8 2 Acta Apostolicae Sedis - Commentarium Officiale

bus institueretur quibus, ad propositum sibi finem assequendum, affluere

eam oporteret. Ad fideles autem quod attinet, dubitandum non est quin

iidem hac in re, quemadmodum in ceteris quae ad religionis bonum spe-

ctant, libenter Pastoribus sacris morem gerant. Edoceantur tantummodo

oportet, Washingtoniensem studiorum Universitatem natam esse cum ad

sacri ordinis homines, tum ad iuvenes quoque laicos instituendos, qui altio-

ribus ibidem disciplinis ita imbui queant, ut non modo aptiSsimi, si opus

erit, praeceptores evadant quibus scholarum catholicarum alumni eru-

diendi committantur, sed etiam ea christianae sapientiae cognitione excel-

lant qua et Ecclesiae iura strenue tueantur et acatholicorum existimationem

sibimet reique ipsi catholicae concilient. Neque putetis, dilecti filii Nostri

et venerabiles fratres, posse vos studiosam iuventutem vestram a frequen-

tandis acatholicis Athenaeis arcere nisi Universitas vestra, et numero

facultatum et doctorum peritia cum iis studiorum domiciliis, quae dixi-

mus, merito comparari atque certare facile possit. Ad sanctissimum igitur

perficiendum opus magna, uti liquet, pecuniae vis quotannis corroganda

est; cuius quidem colligendae curam non moderatoribus, nedum Universi-

tatis Rectori, relinquatis, sed in vosmet ipsos, clero adiutore, suscipiatis

oportet, cum vobis persuasissimum esse debeat, quidquid in Universi-

tatis incrementum confertur, non id a dioecesibus vel paroeciis detrahi,

sed potius reddi collatam pecuniam usuris auctam spiritualibus, quibus

cleri populique profectus feliciter augeatur. Id ipsum Nos quidem vobis

vel ab inito Pontificatu scripsimus: « Quod si paucis necessario Universi-

« tas committitur regenda atque administranda, omnibus tamen cordi

«incrementum eius esse debet, cum in bonum omnium Americae dioe-

« cesium eadem excitata sit ». Quo in genere putamus utilissimum fore

Universitati si certus quidam dominicus dies, unus et idem pro America

universa, constituatur, quem Universitatis diem nuncupati licebit: quo qui-

dem die clerus in omnibus templis, propositis rationibus ac necessitatibus

Athenaei Washingtoniensis, populum ad maiorem quam poterit largita-

tem excitet et stipem, quo modo Ordinario placuerit, corrogandam curet.

Idque ceteroquin per reliquum anni tempus neglegendum non erit. Quid

enim vetat quominus in unaquaque dioecesi et paroecia ex ns sacerdotibus

et fidelibus, qui velint Universitati aliquanto certiora et firmiora, quantum

in se erit, caritatis suae beneficia impertire, consociatio quaedam coalescat

in varias distincta classes seu ordines pro maiore vel minore annua pecuniae

vi, quam se quisque daturum promittat ac spondeat? In qua cavendum ne

suus pueris locus et ordo desit, qui, ut molliore sunt animo et ad nobilis-

sima quaeque plerumque comparato, maximum Institutum vestrum, quod

didicerint esse et fore suae religionis et patriae praesidium, facile, parenti-