QUAESTIO XIX.

Utrum oporteat ponere aliquem numerum excedentem in ipsis motoribus separatis?

Aphrod. citatus quaest, antecedenti. A ver. hic cam. 49. S. Thom. his lect. 9. et 1. part, quaest. 112. art. 4. et 2. contra gentes cap. 92. et quaest. 6. de potent. art. 6. Magisl. 2. dist. 11 . Durand. 2. dist. 3. quaest. 4. Guilelm. Parisien. tract. 3. de Universo in 1. part. 2. part. cap. 64. Ferrar. 3. contra gent. cap. 92. Fland. hic quaest. 6. art. 1. et 4.

Videtur quod non : Numerus est quantitas discreta ; vel numerus est res mathematica a continua non separata, sed intelligentiae sunt absque quantitate; ergo in eis non est numerus.

Item, quanto aliquid propinquius est uni, tanto minus habet de multitudine, sed Intelligentiae sunt propinquiores primo principio, quod est maxime unum; ergo habet minus de multitudine.

Item, numerus substantiarum separatarum est juxta numerum motuum secundum Philosophum, text. 44. et 48. sed numerus ipsorum motuum non est excedens: ergo nec substantiarum.

Oppositum : quanto aliquid est perfectius tanto habet esse in majori multitudine, quia multa bona meliora sunt paucioribus: sed substantiae immateriales sunt perfectissimae inter substantias; igitur, etc.

Juxta hanc dubitationem quaeritur : utrum sit ponere aliquas substantias separatas, ordinem ad motum non habentes? Et videtur quod non : substantiae separatae sunt ponendae secundum quod sunt in optima dispositione, sed in optima dispositione sunt ut causae; sed causae non sunt nisi per comparationem ad motum ; ergo non sunt ponendae nisi per comparationem ad motum. Item, in cognitionem separatorum devenimus per cognitionem sensibilium, sed nihil apparet nobis de substantiis separatis praeter motum ; ergo non est ponere aliquas substantias praeter comparationem ad motum,

Item, dicit Philosophus quod si aliquae sunt substantiae, sunt finis alicujus lationis.

Oppositum : Superiora non sunt inferiora, sed magis e converso: si non esset motus, possibile esset substantias separatas esse, possibile ergo est substantias esse sine comparatione ad motum.