330. De sancto Matthaeo.

1. Depulso mentis nubilo
Christo canamus gloriam,
Cordis ovantes jubilo
Matthaei ob memoriam.

2. Ortus tribu levitica,
Sed publicanus opere,
Sorte sub apostolica
Pollet divino munere.

8. Hic primus evangelium
Scribens Judaeae civibus,
Jam nunc corda fidelium
Doctrinae rigat imbribus.

4. Conversis Macedonibus
Migrat ad Aethiopiam,
Sparsit vitae sermonibus,
Christo fert messis copiam.

5. Doctrinam signis approbat,
Viri credunt et heroes,
Fraudis commenta reprobat,
Cedunt Arphaxat, Cosroes.

6. Ludificatis populis
Magorum per praestigia
Figmenta prodit oculis
Tecta pandens vestigia.

7. Signo crucis eliminat
Morbos, auditum reserat,
Fascinatos illuminat,
Veneno ipsos liberat.

8. Angues magorum crimine
Flammam spirantes naribus
Christi soporat numine
Privans nocendi viribus.

9. Curans Eglippi filium
Sacravit Euphigeniam,
Turbas lavit gentilium
Baptismo donans veniam.

10. Dum certat pro justitia,
Transfixus ictu gladii
Regna scandit coelestia
Palma florens martyrii.

11. Patri, nato, paraclito

Laus, virtus, honor latriae,
Per quem Matthaeus inclito
Fructu potitur patriae.