387

Disceptatio Syiioptiea.

ANIMADVERSIONES

R. P. D. PROMOTORIS FIDEI.

Vincentium Pallotti, indefessum vineae dominicae operarium, Ga-

spari Del Bufalo patria, amicitia, ac vitae ratione devinctum, Alumni

Piae Societatis ab eo institutae Sacro huic Ordini sistunt. Is, quem fere

omnes vidimus, adhuc nostris pene obversatur oculis: vulto demissus,

incessu humilis, alloquio affabilis, Christi mortificationem suo in corpore

circumferre videbatur. Aliquot illi adhaeserant piissimi viri atque mu-

lieres, qui, quaeve eum uti patrem venerabantur, et conceptam de

eodem sanctitatis opinionem inter amicos propagarunt. Hinc, eo de-

mortuo , plures ad eius cadaver invisendum accurrere , sepulchrum

visitare, ac de procurandis eidem caelitum honoribus sese sollicitos

exhibere. Ac Processus quidem Eminentissimi Cardinalis Urbis vicarii

auctoritate digestus fuit; quo tamen perlecto, probandam amplissimi

viri sententiam censui nempe: quoad poenitentiam Ab. Pallotti fuisse

summum, quoad reliqua vero, causam difficultatibus carere non posse.

Difficultatum quidem causas ille non aperuit, quas divinari tamen

difficile non est. Quamvis enim praesentis loci non sit de virtutibus

Servi Dei intimius inquirere, at de fama tantum sanctitatis, deque ab-

sentia cuiuscumque obstaculi, quod ipsam arceat introductionem iudicii;

merito nihilominus ambigi potest an probabilibus ex causis concepta

fuerit ea sanctitatis opinio : an plura facta dictaque Servi Dei, quae in

actis occurrunt, si propter viri simplicitatem bonamque fidem excusari

a gravi culpa valeant, ita etiam, sine merita offensione, aliis legenda

atque imitanda proponi queant. Cum itaque in hisce vera Causae ar -

duitas constituta sit, alioquin autem Ordinaria Inquisitio, si indebitam

extraiudicialium documentorum compulsationem excipias, nihil prima

oculorum coniectu exhibeat, quod nullitatem sapiat;^[duplici tantum

capite, altero scilicet de Fama sanctitatis, altero de Obstaculis, diffi-

cultates omnes complectar.

CAPUT PRIMUM

De fama sanctitatis. Uti praemonui, ait promotor, adeo sin- gularis erat Vincentii nostri exterior agendi ratio, ut vel nolentibus in

oculos incurreret. Eum quippe identidem vidisses ad fores Ecclesiarum,