345. In sancti Miniatis.

1, In laude sui militis
Adsit festive celebris
Agnus ille purpureus,
In quo vicit hic mineus.

2. Praesago quippe nomine
Suo tingendus sanguine
Minias ante proelium
Hoc meruit vocabulum.

3. Sub indecenti Decio
Gravi tortus supplicio,
Unitatis praeconia
Voce fatetur libera.

4. Cavantur ungues sudibus,
Carnes liquescunt ignibus,
Sed non sentit incendia
Simplex auri materia.

5, Hic agonista nobilis,
Tot decoratus titulis,
In congressu novissimo
Subdit cervices gladio.

6. Videres Christi puerum
Caput tollentem proprium
Hinc inde procedentibus
Angelorum cum coetibus.

7. O quam dulce spectaculum
Humanum et angelicum,
Jam immolata victima
Scandit montis cacumina.

8. Laus, honor et imperium
Benigno regi martyrum,
Quos post poenas aethereo
Sacro reddit palatio.