348. De sancto Nicolao.

1. Rex regum Deus omnium,

Sanctorum decus et gloria, qui duces

Sacrae militiae novis
Semper muneribus perspicuos facis
2. Ornas et diademate

Regni perpetuo, quo pariter frui

Tecum vis sine tempore,
Ante principii constitit ut diem.

3. Adsunt unde celebria

Horum festa piis laudibus annua,

Cum mundus sua praemia
Per dimensa sui climata praedicat.

4. Te poscentibus annue,

Uti dulcisonis cantibus hoc die,

Sertis quando micantibus
Nicolaus adit sidera fulgidus.
5. In quarta puer hic semel
Ex sexta feria suxcrat ubera,

Quod mirabile prandium
Contractum minime te sine creditur.
6. Transactis puerilibus

Annis ecclesiae lumina saepius

Observans patrimonii
Haeredem fieri te voluit sui.

7. Auro non modico viri

Sedat pauperiem, quam patitur miser,

Stupro germine nobiles
Tres a se genitas tradere virgines

8. Hoc Myrea metropolis

Digna promeruit praesule perfrui,

Quem divina fidelibus
Vox audita suis signat episcopum.

9. Compulsus precibus maris

Compressit citius grande periculum

Et ponto prope subrutos
Tranquillo penitus restituit loco.

10. Nautis nil minuit datum

Angusto famis in tempore triticum,

Sed per juge biennium
Cunctis hoc fuerat copia civibus.

11. Hostis fraudibus obvians

Vetusti pelago vas oleum ferens

Effundi jubet ocius,
Quod combussit aquae materiem diu.

12. Post poena capitis reos

Tres a morte viros eripit impiger,

Cujus namque potentiae
Et clausae bifores sponte sua patent.

13. In somnis modo Caesarem

Exarchumque modo territat acriter

Et valde positus procul
Pellit parta trium funera principum.

14. Nicolae salutifer,

Et tutor famulis esto perenniter

Cunctis te celebrantibus
Hoc festo placidis cum tibi laudibus.

15. Te mirabiliter colit,

Laudat, magnificat Graecia nobilis,

Immo totius orbis haec
Gaudet meta tibi munera solvere.

16. Mundi Roma caput suis

Aequalem celebrat semper apostolis,

Cujus crebra juvamina
Non multis precibus quaerit et impetrat.

17. Quis non duceret hunc diem

Festum plus reliquis, cum genitoribus

Natos reddit ab hostibus
Raptos ad varii servitii jugam.

18. Ponti multiplices sinus

Observans facili cum prece poscens,

Tempestatibus horridis
Submersis miseros navibus eripis.