403. De sancto Paulino.
Ad Laudes.

1. Sacerdos iste Domini
Stetit in die proelii
Murus inexpugnabilis,
Dux Christiani dogmatis.

2. Deceptis pontificibus
Et subversis principibus
Sub Arii vesania
Laborabat ecclesia.

3. Impugnator perfidiae,
Paulinus, primas Galliae,
Dum pro Europa dimicat,
In Asiam pulsus migrat.

4. Quam impugnat, Constantius
Fidei servit inscius,
Hinc expellens episcopum
Illuc mittit apostolum.

5. Cujus docta eloquiis
Et devicta miraculis
Fracta diis gentilitas
Christo fundat ecclesias.

6. Vinctus dissolvit carceres,
Exsul redemit exsules,
Distribuens dominicam
Ore, manu pecuniam.

7. Permutando exsilia

Defunctus est in Phrygia,
Quem digna passionibus
Donat corona Dominus.

8. Certant Phryges et Treviri
De sancti viri corpore,
Laetatur tandem Gallia
Suo retento praesule.

9. Inter Thebaeos martyres
Et senatorum proceres
Sanctas humat reliquias
In gloria reconditas.