369. In Conversione s. Pauli.

Ad Vesperas.

1. Sancti Pauli conversio
Cum jubilo veneretur,
Totam illustrans saeculum
Per gratiae miraculum.

2. Hic Domini discipulos
Acceptis cum epistolis
Pergit Damascum insequi,
Caedem minando fortius.

3. Christus adest terribilis
Magno splendore luminis,
Ad terram hunc projiciens
Duraque voce alloquens:

4. Saule, cur me persequeris?
Calcitrare non poteris
Meum adversus stimulum,
Qui sum tutor fidelium.

5. Saulus respondit protinus:
Quis es, qui ita coelitus
Loqueris? mihi aperi,
Et sum paratus obsequi.

6. Christus, inquit, sum floridus,
Tu vero nimis stolidus,
Qui mea membra caederis,
Ad poenam tu prosequeris.

7. Pro nobis regi gloriae,
Qui te sacravit hodie,
Preces effunde jugiter,
Te rogamus suppliciter.

8. Praestet hoc nobis trinitas,
Vera et simplex unitas,
Quae Paulum sua gratia
Dignum fecit et gloria.