372. De ss. Petro et Paulo.

1. Passio pontificum
Petri, Pauli rutilat

Orbem totum,
Annua quam colimus

Per tempora.

2. Isti velut lucida
Candelabra rutilant

Ante Deum
Et fruuntur gaudiis

Sine fine.
3. Longo quamvis tempore
Hos errare compulit

Vagus error,
Post conversi Dominum

Secuti sunt.

4. Unus caput exstitit

Totius ecclesiae,

Apostolus
Alter doctor gentium

Exstiterat.

5. Gens humana, respice,
Quanta sit potentia

Larga Dei,
Cum piscator factus sit

Apostolus.
6. Hunc de maris litore
Cum vocaret Dominus

Piscatorem,
Ille linquens retia

Profectus est.
7. Conditor aetherei,
Animi constantiam

Ejus cernens,
Illi claves tradidit

Aethereas.
8. Potestatem pariter
Alligandi dederat

Et solvendi,
Ut suo permaneat

Arbitrio.

9. Quaecunque ligaverit
In terra vel solverit,

Jussu Dei
In coel esti solio

Ita erunt.
10. Persecutor gentium
Paulus quondam fuerat,

Mente caecus,
Qui truncavit plurimum

Christicolas.

11. Ipsius et chlamydem
Milites congerere

Ante pedes
Fecerat et stragula

Occisorum.
12. Sed postquam baptismatis
Lavacrum promeruit

Percipere,
Lupus agnus factus est

Mitissimus.
13. Iste Cappadociam,
Aegyptum et Asiam

Et Arabes,
Pontum et Pamphiliam

Edocuit.
14. Fames atque vincula,
Catenas et verbera

Multa passus,
Ter et maris pertulit

Naufragium.

15. Per terrarum climata
Petrus trahens retia,

Multos Christo
Piscatus est homines

Incredulos.
16. Jam postremo tempore
Romam cum pervenerant,

Martyrium
Victo mago Simone

Susceperant.

17. Per crucis patibulum

Petrus poli sidera

Conscenderat
Et triumphum meruit

Martyrii.
18. Paulus fundens sanguinem
Per mucronis aciem,

Dignus Petri
In agone successor

Effectus est.
19. Felix Roma nimium,
Quae tales promeruit

Defensores,
Quorum semper meritis

Tuta manet.

20. Donec poli sidera,
Sol et luna rutilant

Lampadibus,

Illius nam gloria

Semper erit.

21. Hos precamur sedule
Nostro pro pontifice

Mente pura,
Ut horum suffragiis
Salvus eat.