373. In s. Petri ad Vincula.

1. Tuam, o pater, postulamus gratiam
In cunctis tuam poscimus clementiam,
Mundum qui solus renovasti perditum,
Exaudi preces tibi supplicantium,
Irrigans corda rore sancti spiritus.

2. Quo principalem diem celeberrimum
Petri queamus cumulare laudibus,
Porrigentes hoc canticum hymnidicum,
Pauca canentes dignis tibi vocibus
Ex multis ejus summis mirabilibus.

3. Herodis regis saevis jussionibus
Petrus ligatus catenarum nexibus,
Angelus summis missus a sideribus
Lumen accendit carceris in tenebris,
Petrum eduxit patefactis januis.

4. Praevium cumque sequeretur angelum,
Portae veniret ferreae ad transitum,
Transitum porta praebuit ultroneum.
Tunc exeuntes vicum unum transeunt,
Atque a Petro mox discessit angelus.

5. Ad se reversus Petrus secum loquitur:
Nunc scio vere hunc fuisse angelum,
Desuper missum mihi in praesidium,
Me liberantem ab Herodis manibus
Judaicisque exspectationibus.

6. Gloria patri filioque claritas,
Spiritus sancti una in substantia,
Regnum perenne, lumen indeficiens,
Trinitas summa, indivisa unitas,
Nunc et per cuncta saeculorum saecula.