430. De sancto Siffredo.
Ad Completorium.

1. Jam venit festum celebrandum orbi
Praesulis nostri, meritis beati
Atque praeclari pietate dulci,
Patris amandi.

2. Cujus in festo jubilemus omnes
Supplici voto Dominum precantes,
Ut simul nosmet benedicat omnes
More paterno.
3. Quemque signorum merito decorum
Novimus cuncto viguisse mundo,
Quique defunctos revehit saluti
Sospite vita.
4. Plura virtutum precibus peregit,
Nullus ex illo vacuus redivit,
Penitus cunctis maculas abegit
Causa salutis.
5. Ipse pro nobis Dominum precetur,
Quem fide scimus placuisse Christo,
Cujus optando retinet supernum
Munere regnum.

6. Ad precum vota famulorum justa,
Praesul, intentus, scelerum piator,
Et quod ad culpam facinus patrarent
Pelle luendo.
7. Te, Deus noster, petimus precantes,
Nos ut extorres facias piaclo,
Et gregem pastor proprium reducat
Ad paradisum.

8. Gloriam patri Domino canamus,
Gloriam Christo resonemus omnes,
Cum quibus regnat Deus atque compar
Spiritus almus.