384. De sancta Petronilla.

Ad Vesperas.

1. Concinat plebs fidelium,
Mater Dei sanctissima,
Tuae laudis praeconium,
Quia est per te gloria.

2. Exemplo tuo virgines
Post tuum currunt filium
Puellae atque juvenes
Quam plures in consortium.

3. Ex quibus primiceria
Currit filia principis,
Petronilla sanctissima,
Adhuc in annis teneris.

4. O benedicta filia
Apostolorum principis,
Quis te non cum laetitia
Solemnizet in saeculis?

5. Quae in coelis ab angelis
Honoraris sanctissima
Et a sanctis apostolis
Es visa cum laetitia.

6. Tu intra choros martyrum
Munerans veraciter,
Ardenter ad martyrium
Ivisses et velociter.

7. Petri obedientia
Infirmam lecto tenuit,
In hoc fuisti socia
Confessori, ut decuit.

8. Non qualemcumque virginem
Tu, Petronilla, sequeris,
Sed, quae non habet similem,
Matri Dei conjungeris.

9. Sit benedictus Dominus,
Sit benedicta domina,
Benedictus apostolus
Petrus et sua filia.

10. Gloria tibi, Domine,
Qui Petronillam, filiam
Tui principis, hodie
Induisti laetitiam.