441. De s. Thoma Cantuariensi,

1. Hymnos dulces personemus,
Christum regem collaudemus,
Qui beatum Thomam miro
Consecravit martyrio.

2. Plebem rexit hic Anglicam
Vitam ducens angelicam,
Effulsit in Dei templo
Verbo lucensque exemplo.

3. Libertatem ecclesiae
Dum defendit intrepide,
Bilis regis succenditur,
Sanctus praesul non flectitur.

4. Juxta Christi consilium
Diuturnum exsilium,
Damna probraque patitur,
Domus firma non quatitur.

5. Jejuniis, vigiliis
Pro se suisque filiis
Instans semperque precibus
Ora rigabat fletibus.

6. Membra domans cilicio
Longo punit supplicio,
Jam martyr tali studio
Se praeparat martyrio.

7. Tamquam Christus pateretur
Coram se, sic permovetur,
Fundens rivos fletus magni
Hora sumptionis agni.

8. Caritatis visceribus
Totus fluens pauperibus
Largam manum aperuit,
Amplam coronam meruit.

9. Pastor non mercenarius,
Dignus Christi vicarius
Se pro commissis ovibus
Offert luporum morsibus.

10. Fracta carnis laguncula
Athletae Christi facula
Peccati carens macula
Corruscat per miracula,

11. Ipse dignetur Dominum
Rogare clementissimum,
Ut ab aeternis ignibus
Nos salvetque daemonibus.

12. Sit trinitati gloria,
Sit decus ac victoria
In unitate solida
Per saeculorum saecula.