442. De sancto Trudone.
Ad Vesperas.

1. Eja, fratres, jam plaudite
Trudonis ob memoriam,
Laudes patris attollite
Sequendo sanctimoniam.

2. Qui velut sol in aethere
Fulsit in domo Domini,
Clarus signis et opere,
Deo carus et homini.

8. Ex angeli consortio
Sancto Remaclo paruit,
In largo patrimonio
Christum haeredem statuit.

4. Cordis amans munditiam
Vir totus Deo deditus
Bibit abunde sobriam
Ebrietatem spiritus.

5. Ad fontem vitae sitiens
Fontem dare promeruit,
Aeternam lucem ambiens
Lumen caecis restituit.

6. O Trudo, trade longius
Nostrae salutis aemulum,
Fac nos videre citius
Aeternitatis speculum.

7. Laus dominorum Domino,
Qui nos Trudonis precibus
Coronet sine termino
Cum sanctis suis omnibus.