389. De sancto Petronio.

Ad Nocturnum.

1. Magne confessor sacer et fidelis,
Pastor insignis, pietate mira
Supplicum vota suscipe, precamur,
Sancte Petroni.
2. Lucidum coeli decus o superni,
Terga tu primis positus sub annis
Opibus mundo fugiens dedisti,
Regia proles.
3. Literis claro genitore sacris
Traderis caeco segregatus orbe,
Triplici sacer modulari doctus
Famine linguam.

4, Corde nam volvens juveni responsa,
Quae Dei proles retulit, venumdans
Patre defuncto proprium famenti,
Inclite, fundis.
5. Membra, quos error decipit fatentes,
Caecus, aeternis destinata bustis,
Virginis nato revocas coruscans
Flamine sacro.
6. Coelitus mundo veniens superni
Te poli dignum claviger fidelis
Praesulem nobis tribuit colendum
Indice Christo.
7. Legibus sacris moderare vitam,
Mortis avertas subitos occasus,
Te pium patrem rogitamus omnes
Poplite flexo.
8. Sit Deo patri decus atque virtus
Ac pio nato pariterque sancto
Flamini, cujus jubilat in omni
Gloria mundo.