PARTICULA II.

Utrum voluntas Dei sit causa omnium illorum quae subsunt potentiae divinae ?

Secundo quaeritur, Utrum voluntas Dei sit causa omnium illorum quae subsunt potentiae divinae?

Et videtur, quod sic.

1. Deus non potest facere nisi bona: quia facere mala, ut dicit Anselmus, impotentiae est: sed voluntas Dei est omnis boni: ergo est omnium eorum de quibus est potentia.

2. Adhuc, Deus nihil potest nisi quod vult se posse: et omne bonum vult se posse: ergo potentia et voluntas sunt circa idem.

3. Adhuc, Sicut se habet scientia ad verum, ita potentia ad bonum: sed scientia est omnis veri et tantum veri: ergo potentia est omnis boni et tantum boni: sed omne bonum vult Deus: ergo omne illud vult quod potestate sua potest.

4. Adhuc, Nihil potest Deus quod eo auctore non possit fieri: quod autem eo auctore potest fieri, est bonum, et universaliter bonum: ergo totaliter vult quod potest.

In contrarium est, sig.

1. Quod dicit Psalmus cxxxiv, 6: Omnia quaecumque voluit Dominus fecit, in caelo, et in terra, etc. Si ergo potentia est omnium illorum quorum est voluntas, sequitur quod quaecumque potuit, fecit in caelo et in terra: quod falsum est: multa enim potuit quae numquam fecit, nec faciet.

2. Adhuc, Si voluntas esset omnium sicut potentia, tunc sicut dicitur omnipotens et omnisciens, diceretur omnivolens, quod in praehabitis de potentia improbatum est,

Solutio. Tria prima fundantur super eodem: et ideo unam habent solutionem, ut dicatur, quod cum dicitur, Deus omnia potest, vel potest bona, id quod cadit sub potentia, ampliatur ad ens possibile quod numquam fiet, quod tamen Deus potest et posset facere si vellet. Cum autem dicitur, Deus vult bona, voluntas est relata ad volitum quod sub aliqua differentia temporis, vel fuit, vel est, vel erit: et ideo quamvis potentia et voluntas ambae sint respectu boni, tamen non aequalis ambitus sunt: quia potentia est et ejus quod est, et ejus quod fuit, et ejus quod futurum est, et etiam ejus quod possibile est fore, licet numquam fiat,, Voluntas autem non est nisi respectu ejus quod est, vel fuit, vel erit: et ideo non sequitur, si omnia quaecumque voluit Dominus fecit, in caelo et in terra, quod omnia quaecumque potuit, fecit in caelo et in terra.

Ex hoc etiam patet, quod omnia quae vult eo auctore possunt fieri, nec tamen quaecumque potest, fiunt eo volente: non enim vult, quod omnia fiant quae potest.

Ex hoc etiam ulterius patet, quod non potest dici omnivolens, sicut dicitur omnisciens et omnipotens: quia non omnia fieri vult quae potest et scit.

Et per hoc patet solutio ad totum.

ARTICULI PRIMI