466. De sancta Ursula.
Ad Vesperas.

1. Sanctarum virginum divina gratia
Sequentes Dominum coetus ex Anglia
Collaudent omnium regis in gloria
Reginam matrem gratiae.
2. Harum est Ursula prima fidelium,
Quae Dei famula, flos quasi lilium,
Gaudet tot milibus fieri virginum
Regalis primiceria.
3. Collectae citius per regem Angliae
Omnes quantocius mittuntur Ursulae,
Sic de Britannia transit Coloniam
Exsultans cum sodalibus.
4. Ad urbem properat felix haec Ursula
Et ejus praesuli praesentat milia
Tot, fit ecclesia exsultans jubilo
De coeto tanto virginum.

5. Cum pleno numero redit Coloniam,
Ubi martyrio vincunt saevitiam,
Cessit his gladius sanctis virginibus
Non vincens in victicibus.
6. O virgo virginum, mater et domina
Quae paris Dominum, haec tua Ursula
Venit tot milium cincta familia
Ad regem, cui gaudia.
7. Sit sponso virginum aeterna gloria,
Qui lumen luminum regnat in patria,
Idem substantia cum patre, flamine,
Nos juvet harum precibus.