420. De sancta Scholastica.

1. Ut tuas laeti valeamus omnes,
Poscimus, semper reboare laudes,
Organum nostrae reserare vocis,
Virgo sacrata.
2. Virgo germanum properans adire,
Protinus sanctus Benedictus, ecce,
Obviam illi fuerat suetus
Promere dogma.
3. Sic soror sanctum nimium rogabat:
Frater, hic mecum volo te manere,
Usque dum phoebus radios reducat,
O Benedicte.
4. Abnegat frater voti compar esse
Congruis sacrae precibus sororis,
Mox Deum poscens meruit tenere,
Quod cupit ipsa.
5. Virgini Christus tribuit triumphum,
Coelitus fundens latices per arva,
Reddit invitus, noluit quae sponte,
Carmina sacra.