422. De sancta Scholastica.

Ad Nocturnum.

1. Coeli cives, applaudite
Et vos, fratres, concinite
Matris nostrae solemnia
Solis reduxit orbita.

2. Hinc ergo psalmi resonent,
Hinc lectiones concrepent,
Et hymnorum dulcissima
Multiplicentur cantica.

3. Quod lingua foris personat,
Intus affectus sentiat
Nec imitari pigeat,
Quod laudare mens approbat.

4. Hanc post mundi curricula
Vidit sanctus Benedictus
In columbae specifica
Coelum ire divinitus.

5. Scholastica, virgo optima,
Salus nostra tu omnium,
Fusis precamur vocibus,
Adjuva sanctis precibus.

6. Dum hoc manemus saeculo,
Vitae trahentes tenebras,
Per te, rogamus, jugiter
Lapsus vitari pessimos.

7, Sit tibi, Jesu Domine,
Virtus, honor, imperium,
Qui regnas ante saecula
Cum patre, sancto spiritu.