480. De sancto Victorino.
In 2. Vesperis.

1. Laetus dies revertitur
Victorini martyrio,
Sacri dum rota vertitur
Solis obliquo circulo.

2. Surgens, plaudens, Assisium,
In martyris praeconia
Mentis expone jubilum,
Laudis depromens cantica.

3. Novum sidus claruit
Superno tibi munere,
Quo vetus error vanuit
Jam lucis orto sidere.

i. Victorinus, vir inclitus,
Suo respondens nomini,
Carnem dat legi spiritus,
Mundi victor et vitii.

5. Hunc nutu Dei praevio
Transmisit huc Assyria,
Ut te trahat a devio
Coruscans per prodigia.

6. Sputi caecum ab utero
Luto dat frui lumine,
Quinquenni linguam puero
Diserto laxat famine.

7. Dum sanctus inter verbera
Persistit constans, humilis,
Hunc ferientis dextera
Mox redditur immobilis.

8. Fervore comptus spiritus
Carnis devicto vitio,
Foris servatur coelitus
Fornacis ab incendio.

9. Tyranni tunc imperio
Lictoris manus impia
In sanctum fervens gladio
Beata finit proelia.

10. Sic sparso verbi semine
Victorini victoria
Pro felici certamine
Coeli potitur gloria.

11. Nos martyris memoriam
Colentes et praeconia,
Jesu, perduc in patriam
Per ipsius suffragia.

12. Pater, natus, paraclitus,
Quibus sit laus et gloria,
Sancti det hujus merito
Beata nobis gaudia.