426. De sancto Secundino.

1. Christi, rex regum, pretium tuorum,
Nostra, qui digne tibi militantis
Res Secundini canimus secundas,
Vota secunda.
2. Hujus insignem celebremque vitam,
Nobiles mores, veteres triumphos
Mira virtutum noviter suarum
Prodita pandunt.
3. Falsa promentem jaculo doloris
Percutit, vero videt hic reatum,
Poenitet dicti, sua poenitentem
Poena relinquit.

4. Cujus oblectant animam tepores
Veris aeterni fovet et quietis
Aura coelestis, nequit hujus artus
Flamma nocere.

5. Omnibus membris prope destituto,
Qui suum tantum poterat tueri
Jus preces fundens, celerem refundit
Lingua salutem.

6. Praesuli tanto vacuare facta
Vota temptante valitudo nectit,
Sospitas gressus eadem parantis
Solvere solvit.

7. Fimbriis pallae decorantis aram
Cereus mistus penitus crematur,
Fimbriae vero nihil ustionis
Perpetiuntur.

8. Splendor aeternus, decus et triumphus
Cum coaeterno tibi sit parente
Atque cum sacro pariter superna
Flamine, proles.