427. De sancto Servulo.
Ad Vesperas.

1. Primo dierum omnium,
Quo servus Christi floruit,
Servivit hic et profuit,
Est hoc Deo gratissimum.

2. Pulcher prae cunctis Servulus,
Mente plus placens Domino,
Sortitur partem optimam
Inter patronos maximos.

3. Vocatus hic a Domino
Respondet: adsum servulus,
Ad parentes revertitur
Solo jussu dominico.

4. Annos habens duodecim
Divina voce petitur,
Almam sortitur gratiam
Sancto calescens flamine.

5. Anno uno et mensibus
Novem orationibus
Intendit totis viribus
Nihil edens in spelaeo.

6. Clamat de coelo Dominus
Ei: Dulcis o Seruile,
Audita est oratio,
Pete, quod vis, et dabitur.

7. Ex improviso coluber
In campum exit maximus,
Erecta cruce perimit
Athleta Christi daemonem.

8. Proinde te, piissimi,

Precamur omnes supplices,
Ut Tergestinis Servuli
Preces semper proficiant.