442. De sancto Syro.
Ad Vesp. et Noct.

1. Laudet mater ecclesia
Christum, lumen de lumine,
Qui nos per sanctos inclitos
Suo ditavit munere.

2. Exsultet specialiter
Urbs Ticinensis populi
In festo sacratissimo
Syri, patroni proprii.

3. Jam a Christo in Simonem,
Post Marcum in Armagoram,
Inde descendit gratia
In Syrum atque Inventium.

4. Ordinatus episcopus
Syrus Papiam mittitur,
Inventius clarissimus
Sibi comes adjungitur.

5. Istos binos apostolos

Ad nos transmisit Dominus,
Caterva venit obviam
Exclamans magnis vocibus:

6. Ingredere, ingredere,
Pater desiderabilis,
Et nos errantes revoca
Tuis sacratis monitis.

7. Ut pater beatissimus
Post in urbem ingreditur,
Omnis infirmus supplicans
Saluti restituitur.

8. Gloria sit ingenito,
Gloria unigenito
Una cum sancto spiritu
Et nunc et in perpetuum.