444. De s. Syro Januensi.
Ad Vesperas.

1. Exsultet laude Janua
Festa resumens annua,
Ipsius sancti praesidis
Syri repleta gaudiis.

2. Culturae sancti traditur
Felicis clara plantula,
Sacris doctrinis colitur
Fructus virtutum bajula.

3. Infans saliva merulam
Vita donavit mortuam,
Verbo ligans navigium
Contra ventorum impetum.

4. Super Felicem claruit,
Sanctusque Syrus meruit
Videre patris dexteram
Dei potentis fulgidam.

5. Videns cartae chirographum
Frangi Satan cum vertice,
Syrus risum insolitum
Dat pro notato indice.

6. Haec abscondisti senibus
Doxam revelans parvulo,
Onus tuum ut levius
Ferret pastor in populo.

7. Syrum ne tollat visio,
Praeceptori obtemperat,
Compulsus pro exsilio
Maticianam properat.

8. Parentum, mundi, patriae
Sprevit Syrus solatium,
Melle refectus latriae,
Mitis ferens exsilium.

9. Natam sanavit Gallio
Vexatam a daemonio,
Sic omnes curat propere
Syrus languentes peregre.

10. Vocatus ab exsilio
Syrus Felici reserat,
Divino quae sub brachio
Exsul portenta fecerat.

11. Aurem appone vocibus
Nostris, da locum precibus
Syri, Christe, discrimina
Pelle purgando vitia.

12. Fides cujus praesidia,
Plebi dat suae gaudia
Syrus, Deo sit gloria
Modo per cuncta saecula.