463. De sancta Ursula.

1. Fulgor adspectus placuit virorum
Visibus, mentis decor at supernis
Ursulae turmis, merito potentis
Nobilis ortus.

2. Luctibus patris tulit haec juvamen,
Non timens regis furias caduci,
Nixa virtuti Domini potentis
Virgo pudica.

3. Quaeritur sponso, trahit illa sponsum,
Dumque se profert, socias requirit,
Aggregat festo celeres ministros
Laeta futuro.

4. Jungitur sacrae comitum cohorti
Sanctior cleri celebris caterva,
Advenit patrum cupidus coronae
Fulgidus ordo.

5. Summus oblatum decus et resignat
Pastor, haud damni pavidus minoris,
Dedicans Christo comites lavacro,
Virginis almae.

6. Irruit cultro ferus interemptor,
Agminis sacri madidus cruore,
Spiritus coelo subeunt aperto
Ossa Colonis.

7. Ergo pulsantes Dominum rogate,
Parva quo virtus meritis juvetur
Nostra, sub magnis laqueis malorum
Undique cincta.