MEMBRUM III.

Quae sit comparatio simplicitatis Angeli ad simplicitatem divinam, et ad simplicitatem animae rationalis ?

Tertio quaeritur, Quae sit comparatio simplicitatis Angeli ad simplicitatem divinam, et ad simplicitatem animae rationalis?

Et videtur, quod nulla.

1. Dicit enim Augustinus, quod simplicitas divina tanta est, quod Deus est quidquid habet: habet enim vitam, et ipse est sua vita: habet justitiam, et ipse est sua justitia: habet virtutem, et ipse est sua virtus. Angelica simplicitas nihil horum admittit: Angelus enim nec vita sua est, nec intelligentia, nec justitia, nec aliquid eorum quae habet. Ergo nulla est comparatio simplicitatis divinae ad angelicam.

2. Adhuc, Damascenus in libro II de Fide orthodoxa dicit, quod " Angelus in comparatione Dei corporalis est : " corporalis autem ad simpliciter incorporale, in simplicitate nulla est comparatio vel proportio: ergo videtur, quod Dei et Angeli in simplicitate nulla sit comparatio.

3. Adhuc, Ad animam rationalem non videtur esse comparatio: unibilis enim cum corpore, et non unibilis, in simplicitate nulla comparatio est: anima rationalis unibilis est cum corpore, Angelus non unibilis: ergo in simplicitate nullam habent comparationem.

Solutio. Dicendum, quod duplex est comparatio. Una est univoci, quae est secundum unum quod est in duobus vel pluribus secundum unam et eamdem rationem, sicut dicimus album, albius, albissimum: et de hac dicit Philosophus, quod comparatio univoci est. Et talis comparatio in simplicitate non est inter Deum, et Angelum, et animam rationalem.

Alia est comparatio analogi, hoc est, unius quod est in pluribus secundum analogiam sive proportionem ad aliquod unum, sicut dicimus esse Deum justiorem Angelo vel homine: quia secundum proportionem justitiae ad actum,

quae est reddere unicuique quod suum est, Deus essentialiter justus est, et rectitudinem et perfectionem actus justitiae semper contingit, et ab eo deflecti non potest. Angelus autem et homo participative justi sunt, et a rectitudine actus et perfectione deflecti possunt.

Similiter dicimus de simplicitate, quod cum simplicitas in Deo, in Angelo, et in anima rationali non sit univoce, secundum primum modum non potest esse comparatio simplicitatis inter Deum, et Angelum, et animam rationalem. Secundo autem modo quodammodo est comparatio: quia maxima simplicitas est, quae est in fine simplicitatis, ut scilicet idem sit habens et quidquid habet, et sint idem per essentiam, hoc est, quod una sit essentia habentis et quidquid habet. Et minor simplicitas est in eo quod participative simplex est, nec est quidquid habet. Et minima simplicitas sit ejus quod unibile est corpori quantitatem habenti, et dividitur secundum potentias secundum partes organicas corporis.

Ad primum ergo dicendum, quod non est comparatio sicut univoci, sed quodammodo est sicut analogi.

Ad aliud dicendum, quod Angeli non dicuntur corporales, nisi secundum quemdam modum: quia scilicet locales sunt definitive, sicut dictum est in quaestione de definitione Angeli.

Ad aliud dicendum, quod unibilitas animae ad corpus non impedit comparationem analogi, licet impediat comparationem univoci.